تعليم طفلى الأحاد والعشرات والمئات والآلآف ، النظام العشرى مونتيسورى

طريقه عمل النظام العشرى فى المونتيسورى

الى بيعلمو أولادهم منتسورى عارفين ان البنك الخاص بالنظام العشرى غالى نسبيا اقل جزء من البنك ب ٨٠٠ غير بطاقات الأرقام النسخه ب٢٥٠ وبنحتاج اكتر من نسخه فى الجمع والطرح والضرب والقسمه شوفو بقا هتتكلف كام
بس ممكن تعمليها فى البيت بأبسط التكاليف

بفضل الله قدرت اعمل البنك ومكلفنيش اقل من ٢٠٠

الأدوات المستخدمه:

انا جبت ب ١٠٠ خرز وسلك نحاسى من البيت ممكن تشتريه من عند بتاع أدوات الكهربا او لو عندك سلك من بتاع الدش مقطوع ممكن تستخدميه تاخديه من جوا
هنعمله ازاى هنحتاج على الأقل ٩ خرزات لوحدهم ودا هيمثل الأحاد
هنستخدم السلك لعمل عمود العشرات بيكون فى ١٠ خرزات
وهنجمع ١٠ أعمده من العشرات بالسلك ليكون مربع المائه

مكعب الالف بيتكون من ١٠ من مربعات المائه وعشان هيكلفنا كتير انا طبعته وعملته على شكل مكعب من الكارتون

دا لينك الطباعه من ( هـــــنـــــــــا )



وطبعت كمان الارقام بالحجم الكبير نسخه واحده والحجم الصغير اقل شى نسختين هنستخدمهم فيما بعد فى العمليات الحسابيه الطباعه باللغه الإنجليزيه ممكن تستخدموهم او لو عاوزين عربى ممكن تعملوهم انتم او تطبعوه على ورق كوشيه عشان تكون كرت وتكتبو على الضهر بالعربى عشان المقاسات تطلع مظبوطه أنا كتبت على الظهر الارقام بالعربيه والوجه الاخر سنستخدمه مره أخرى باللغه الإنجليزيه

دا لينك طباعه الارقام بالحجم الكبير

من هــــــنــــــــــــا

دا لينك الأرقام بالحجم الصغير
من هـــــــنــــــــــــا

بعد الطباعه بتقص الأرقام وممكن نغلفها حرارى عشان تحافظ عليها
سجاده النظام العشرى سهل تتعمل بكل سهوله من الجوخ الأحاد باللون الأخضر والعشرات أزرق والمئات بالأحمر والالاف بالأخضر الألوان دى أساسيه فى المنتسورى مينفعش تغيريها
بعد ما نعمل الأداه او تشتريها الأنسب ليكى

هنقدم للطفل الدرس الأول للطفل وهو تسميه الكميات

هنجيب خرزه واحده وعمود من العشرات ومربع المائه ومكعب الالاف
وهنضع كل كميه فى الخانه الخاصه بيها هجعل يمسك الخرزه واقوله دى وحده واحده وبتسكن هنا فى الاحاد
دا وحده واحده من العشرات وهخليه يعدها واقوله بتسكن هنا فى العشرات ويمسك المائه واقوله دى وحده واحده من المئات وفيها عشره من العشرات وبتسكن فى المئات
ودى وحده واحده من الالاف وبتكون من ١٠ مربعات من المائه وبسكن هنا فى خانه الالاف

بعد كدا بنقدم الدرس الثلاثى الى هو اسمى تانى الكميات
تانى حاجه اطلب منه انه يشاور مثلا على الالاف على المئات وهكذا او اخلى يجيب الكميه على ايدى
تالت مرحله اسأله دا ايه ودا ايه وهو يجاوب وبكدا اكون اتأكدت انه عرف الكميات بالخانات بتاعتهم
وهنا هيكون انتهى الدرس الأول
إن شاء الله فى تدوينات أخرى انزل باقى الدروس

العمر المناسب : من ٥ سنوات فما فوق او حسب استيعاب الطفل